Jer 7 | NdeIBE | STEP | Leli yilizwi elafika kuJeremiya livela kuJehova lisithi:

Jeremiah 7

Ukholo Lwamanga Luyize

1 Leli yilizwi elafika kuJeremiya livela kuJehova lisithi:

2 “Mana esangweni lendlu kaJehova umemezele ilizwi leli ukhonapho uthi: “ ‘Zwanini ilizwi likaJehova, lonke lina bantu bakoJuda abangena ngala amasango ukuzakhonza uJehova. 3 UJehova uSomandla, uNkulunkulu ka-Israyeli uthi: Lungisani izindlela zenu lezenzo zenu, ukuze ngilivumele ukuba lihlale kule indawo. 4 Lingathembi amazwi akhohlisayo lithi, “Leli lithempeli likaJehova, ithempeli likaJehova, ithempeli likaJehova!”

5 Lingalungisa izindlela zenu lezenzo zenu sibili liphathane ngokulunga, 6 uma lingancindezeli owezizweni, izintandane loba umfelokazi njalo lingachithi gazi elingelacala kule indawo, njalo uma lingalandeli abanye onkulunkulu okuzalilimaza, 7 ngizalivumela ukuba lihlale kule indawo, elizweni engalinika okhokho benu ukuba libe ngelabo kuze kube nini lanini.

8 Kodwa khangelani, lina lithemba amazwi akhohlisayo angasizi lutho.

9 “ ‘Kambe lizantshontsha njalo libulale, lifebe, lifunge amanga, litshisele uBhali impepha njalo lilandele abanye onkulunkulu elingakaze libazi, 10 beselisizakuma phambi kwami kuyonale indlu, eleBizo lami, lithi, “Sivikelekile” – livikeleka ukuba lenze zonke lezizinto ezenyanyekayo na? 11 Indlu le, eleBizo lami, seyaba lubhalu lwabaphangi na? Kodwa kade ngikhangele! kutsho uJehova.

12 “ ‘Hambani khathesi endaweni yami eShilo lapho engenza khona kuqala indawo yokuhlala iBizo lami, libone engakwenza kuyo ngenxa yobubi babantu bami bako-Israyeli. 13 UJehova uthi, kwathi lapho lisenza lezizinto, mina ngakhuluma lani futhifuthi, kodwa kalingilalelanga; ngalibiza, kalaze lasabela.

14 Ngakho-ke, lokho engakwenza eShilo khathesi ngizakwenza kule indlu eleBizo lami, ithempeli elilithembileyo, indawo engalinika yona lina kanye labokhokho benu. 15 Ngizalixotsha phambi kwami, njengalokho engakwenza abafowenu bonke, abantu bako-Efrayimi.

16 “ ‘Ngakho abantu laba ungabakhulekeli loba ubakhulumele kumbe ubenzele isicelo; ungangincengi ngoba angiyikukulalela.

17 Abakwenzayo emadolobheni akoJuda lasemigwaqweni yaseJerusalema kawukuboni na? 18 Abantwana batheza inkuni, oyise babasa imililo, labesifazana baxova inhlama benzele iNdlovukazi yaseZulwini isinkwa. Bathelela abanye onkulunkulu iminikelo yokunathwayo ukuba bangithukuthelise. 19 Kodwa yimi abangithukuthelisayo na? kutsho uJehova. Kabazilimazi bona ngokwabo na, okulihlazo kubo?

20 “ ‘Ngakho uJehova Wobukhosi uthi: Ukuthukuthela kwami lolaka lwami kuzakwehliselwa kule indawo, phezu kwabantu lasezinyamazaneni, phezu kwezihlahla zeganga laphezu kwezithelo zomhlabathi; njalo kuzakutsha kungacitsheki.

21 “ ‘UJehova uSomandla, uNkulunkulu ka-Israyeli uthi: Qhubekani, fakani iminikelo yenu yokutshiswa kweminye imihlatshelo yenu lidle inyama lina ngokwenu! 22 Ngoba ekukhupheni kwami okhokho benu eGibhithe ngikhuluma labo, angizange ngibanike imilayo nje kuphela ngeminikelo yokutshiswa lemihlatshelo,

23 kodwa ngabanika umlayo lo othi: Ngilalelani, njalo ngizakuba nguNkulunkulu wenu lina libe ngabantu bami. Hambani ngezindlela zonke engililaye zona, ukuze kulilungele. 24 Kodwa kabazange balalele kumbe banake; esikhundleni salokho, bona balandela inkani yentando yezinhliziyo zabo ezimbi. Baya emuva hatshi phambili. 25 Kusukela ngesikhathi okhokho benu besuka eGibhithe kuze kube khathesi, usuku ngosuku, njalonjalo ngalithumela izinceku zami abaphrofethi.

26 Kodwa kabangilalelanga kumbe banake. Babelezintamo ezilukhuni njalo benza ububi obudlula obabokhokho babo.’

27 “Lapho ubatshela konke lokhu, kabayikukulalela; lalapho ubabiza, kabayikusabela. 28 Ngakho batshele uthi, ‘Lesi yisizwe esingalalelanga uJehova uNkulunkulu waso kumbe sivume ukuqondiswa. Iqiniso selifile; kalisekho ezindebeni zabo. 29 Gelani izinwele zenu lizilahlele khatshana; lenze isililo emiqolweni elugwadule, ngoba uJehova usesalile wasidela isizukulwane lesi esingaphanasi kolaka lwakhe.

ISigodi Sokubulala

30 “ ‘Abantu bakoJuda benze ububi phambi kwami, kutsho uJehova. Bamise izithombe zabo ezenyanyekayo endlini eleBizo lami balingcolisa.

31 Sebakhe izindawo eziphakemeyo zaseThofethi esigodini saseBheni Hinomi ukuba batshisele khona amadodana lamadodakazi abo ngomlilo – into engingabalayanga yona, engazange ifike engqondweni yami. 32 Ngakho qaphelani, izinsuku ziyeza, kutsho uJehova, lapho abantu bengayikuyithi yiThofethi kumbe iSigodi saseBheni Hinomi, kodwa iSigodi sokuBulala, ngoba abafileyo bazabangcwaba eThofethi kuze kusweleke indawo. 33 Lapho-ke izidumbu zabantu laba zizakuba yikudla kwezinyoni zasemoyeni lezinyamazana zomhlaba, njalo akuyikuba lomuntu ozazethusa. 34 Ngizaqeda imisindo yokuthokoza leyenjabulo emadolobheni akoJuda lasemigwaqweni yaseJerusalema, lokuthaba lelizwi lomlobokazi lelomyeni, ngoba ilizwe lizachitheka.